Represhon,
Mantenshon &
Logístika

E departamento di Represhon ta e departamento ku ta sali bai duna asistensia na sitionan di kandela. Tambe nan ta intervení kontra di desaster.

Yamadanan di emergensia

E departamento di Represhon ta haña yamada pa sali bai atendé insidente i duna asistensia aproksimadamente 1300 bes pa aña. E ta operá 24 ora pa dia, 7 dia pa siman. Ora mester di asistensia di e departamento di Represhon, siudadanonan mester yama 911. E yamada lo drenta na polis i nan lo pasa tur e detayenan pa sentral di Brantwer. Na e momento aki e bomberonan ta sali pa atendé ku e situashon ku a surgi.

E situashonnan den kual ta rekerí asistensia di e departamento ta wòrdu repartí den 3 kategoria di prioridat: Prio 1, 2, òf 3. Prio 1 ta ora bida di hende ta na peliger òf por surgi dañonan grandi na bienes grandi pa motibu di e kandela. Prio 2 ta kasonan den kual por kousa kandela òf un situashon peligroso por surgi pero ku menos urgensia. Un ehèmpel di esaki ta ora tin zeta riba kaminda ku mester wòrdu kitá promé ku e pega kandela. Prio 3 ta kasonan masha chikí ku no tin urgensia. Un ehèmpel di esaki habrimentu di un kandal ku no ta forma peliger pa ningun persona. Pa tur loke ta trata Prio 1 e departamento tin 1 minüt pa sali si e situashon surgi den dia. Si e sosodé anochi nan tin 1 minüt i mei pa sali.

Entrenamentu kontinuo

E personal di e departamento di Represhon ta haña entrenamentu kontinuo pa nan keda kompetente riba tur tereno di nan trabou. Nan ta hasi esaki pa motibu ku kada bes insidentenan ta keda kambia di forma i intensidat.

E partinan di e departamento

E departamento di Represhon ta konsistí di dos diferente parti: e parti Represivo i e parti di Mantenshon i Logístika. E parti Represivo ta enserá e trabou ku mester hasi pa kombatí i paga kandela ora esaki surgi den un edifisio òf kualke otro tereno. Den e parti di Mantenshon i Logístika tin e Servisio Tékniko (Technische Dienst) ku ta sòru pa tur material i ekipo ta na òrdu i kla pa sali pa bai atendé ku insidente. Esaki ta enserá tur material ku ta riba e vehíkulonan, kual ta inkluí slan i hacha. Ademas Servisio Tékniko ta konsistí di un Sectiehoofd ku tin tres Monteur i un Magazijnbeheerder bou di dje. Nan ta enkargá ku e parti di mantenshon, logístika i wardamentu di tur material i vehíkulonan di Brantwer Kòrsou.

E funshonnan di e parti represivo

Den e departamento di Represhon tambe tin diferente funshon. Tin e funshon di Manschap, kual ta e bomberonan ku ta sali bai kombatí kandela. Riba dje tin e funshon di Wacht Commandant, kual ta esun ku ta tuma liderato di e operashonnan na e sitio di e kandela, pues e ta koordiná tur aktividat pa asina garantisá tur hende su seguridat. Si surgi un insidente ku ta rekerí e servisionan di mas ku un pòst, e ora ei un Officier ta tuma e liderato operashonal. Riba dje por tin un Hoofd Officier tambe ku ta koordiná e aktividatnan di e Officier. E departamento Represivo tin un total di 91 personal ku ta envolví den kombatí kandela, di kual 20 ta òf por sirbi e funshon di Wacht Commandant i e sobrá 71 ta Manschap.

Potensial represivo

E departamento di Represhon tin kuater tipo di vehíkulo prinsipal pa atendé insidente, kual ta Rescue Wagen, Tènk Outo Spuit, Tènker i Ladder Wagen. Tambe e tin 4 diferente pòst situá na Barber, Steenrijk, Rio Canario i Mundu Nobo. Pòst Mundu Nobo ta e pòst prinsipal di e departamento di Represhon, kaminda mayoria di personal i ekiponan ta aloká.

13Vehíkulo
91Bombero
4Pòst

Deklarashon di Kandela

Aki nos tin un deklarashon di kandela disponibel pa ora tin un insidente den kual un kandela a surgi den un edifisio òf kualke tereno. E personanan ku a wòrdu afektá pa e kandela por yena nan datonan akinan i klek riba 'entrega.' E proseso ta similar na ora bo hasi aangifte na polis si bo bira víktima di un delito. Ora nos risibí e deklarashon yená nos lo tuma kontakto kubo pa bo pasa na nos ofisina pa firm'é.

Kopia ID