Enseñansa i estudio spesialisá
Entre e responsabilidatnan di e departamento di Preprashon i Entrenamentu ta pa fasilitá un enseñansa/estudio i entrenamentu spesialisá na e personal di manera ku nan por ser promové na un rango mas altu. Asina e personal ta wòrdu kapasitá pa ehersé su funshon nobo korektamente. Tambe e departamento ta enkargá ku e enseñansa i estudio pa koleganan nobo ku kuminsá traha na Brantwer Kòrsou.
E departamento di Preprashon i Entrenamentu tambe ta yuda prepará e trahadónan i kumpra material pa nan usa durante di kombatimentu di desaster (Rampenbestrijding). Den e entrenamentu aki nan ta prepará e personal di Represhon pa e trabou importante pa atendé den kalamidat manera kandelanan grandi i desasternan natural.
Plan di evakuashon
E departamento di Preparashon i Entrenamentu ta yuda guia kompanianan di manera ku nan por traha un plan di evakuashon básiko pa nan edifisio. Na momentu ku e plan di evakuashon ta kumplí ku tur kondishon di PRO e ta haña aprobashon di Brantwer Kòrsou.
E Kurso Bedrijfsbrandbestrijding
Un otro aktividat di e departamento di Preparashon i Entrenamentu ta pa duna e kurso BBB na empresa i otro instansia. BBB ta para pa Bedrijfsbrandbestrijding i e kurso ta trata di preparashon pa intervení kontra di kandela na un kompania òf instansia. E preparashon aki ta wòrdu fasilitá na empleadonan di diferente kompania na Kòrsou. Durante e kurso aki e personal di Brantwer ta duna empleadonan konseho i instrukshon riba kiko nan mester hasi si un kandela surgi den e edifisio kaminda nan ta traha. Den e kurso nan ta siña kon pa paga e kandela nan mes promé ku e sali for di man. Ora e empleadonan kompletá e kurso, nan ta risibí un sertifikado, firmá dor di e komandante di Brantwer. E sertifikado ta indiká ku nan ta kapasitá pa atendé ku kandela chikitu den nan edifisio. E periodo ku por apliká pa risibí e kurso ta di e luna di mart te ku sèptèmber.
Ademas e departamento aki sa duna simulashon di evakuashon na kompania òf instansia pa prepará nan den kaso di kandela. Un kompania òf instansia ta kualifiká pa risibí e simulashon aki ora nan optené un aprobashon di seguridat di e departamento di Prevenshon, sertifikado di BBB i un aprobashon di nan plan di evakuashon.
