Departamento di sosten
E departamento di Asuntunan Personal i General ta sostené komandante di Brantwer i e otro departamentonan riba tereno di Personal, Informátika (ICT), Organisashon & Finansa, Rekurso Humano i maneho di agènda i korespondensia di kartanan interno i eksterno.
E departamento tin un hefe i koleganan ku ta enkargá ku e tareanan ariba menshoná. E departamento aki ta enkargá, entre otro, ku e maneho di e presupuesto di e organisashon, e trabounan di personal i e diferente otro enkargonan atministrativo.
Kuminsá un karera na Brantwer Kòrsou!
Nos tin diferente funshon den kual bo por konstruí un karera balioso. Si bo tin interes pa yuda sirbi bo komunidat yena bo datonan riba nos página di vakatura.
Trahando Komo Un Tim
E departamento di Asuntunan Personal i General ta ehekutá tur su tareanan ku dedikashon pa asina aliviá e peso di atministrashon for di e otro departamentonan ku ta hasi nan trabou den komunidat. Ta asina tur e departamentonan di Brantwer Kòrsou ta komplementá otro den nan trabou. Nos ta traha komo un tim pa duna e pueblo di Kòrsou e mihó asistensia posibel den momento di emergensia. Por ehèmpel, e trabou di e departamento di Prevenshon ta duna un aporte klave na e trabou di e departamento di Represhon.
Ku otro palabra, e departamento di Prevenshon ta hasi un trabou importante pa segurá ku edifisionan ta protehá kontra di kandela. Komo resultado di e trabou aki, e ekspanshon di e kandela (si e surgi) ta keda limitá. Pa motibu di e servisio aki, asta si e bomberonan mester yega na e sitio di kandela for di distansia largu, nan por intervení na tempu ainda.
