Konsehonan pa seguridat
E departamento di Prevenshon ta duna konseho na diferente instansia tokante prevenshon di kandela den nan edifisio. Tambe e departamento ta duna konseho pa seguridat kontra di kandela na e departamento di ROP (Ruimtelijke Ordening en Planning). Esaki ta pa konsehá nan den nan trabou di duna pèrmit na edifisionan ku ta den proseso di konstrukshon na Kòrsou.
Banda di ROP, e departamento tambe ta duna konseho na e ministerio di MEO (Ministerie Economische Ontwikkeling). Esaki ta un otro instansia di gobièrnu ku ta duna pèrmit pa operá un restorant, hotèl òf diskoteka. Tambe nan ta pidi su evaluashon i konseho pa ku prevenshon di kandela den espasionan di bende kuminda durante temporada di Karnaval.
Temporadanan di fiesta
Ademas tin temporadanan den kual tin mas nesesidat pa servisionan di prevenshon. Den temporada di Karnaval i Seú e departamento di Prevenshon ta espesialmente aktivo pa kontrolá si tur elemento riba e ruta di e paradanan ta kumpli ku e normanan di seguridat kontra di kandela. Tambe den temporada di fin di aña, ora tin hopi vürwèrk, e departamento tin un ròl bastante importante. Den e promé fase di su aktividatnan e ta tèst e seguridat di e vürwèrknan mes. Den e di dos fase e ta kontrolá e lokalidatnan ku ta bende vürwèrk pa evaluá si nan ta kualifiká pa haña aprobashon di Brantwer Kòrsou. Despues e departamento ta kontrolá si e parti di benta di e vürwèrk tambe ta kana segun normanan di seguridat.
Kampaña di Informashon
Personal di e departamento di Prevenshon kontinuamente ta bai skolnan, sentronan di bario i otro instansianan públiko den transkurso di aña pa duna seshonnan di informashon tokante prevenshon di kandela. Pa mas informashon tuma kontakto ku nos.
Foyeto i dokumentonan
Departamento di Prevenshon tin un seri di foyeto i dokumento disponibel ku diferente tep i puntonan di atenshon. Nan ta pa informá siudadanonan ku kiko nan mester tene kuenta pa nan seguridat kontra di kandela den kas, kas di kuido, pre-eskolar, skol i den e diferente temporadanan di fiesta.